Nakaagom sang minor injuries ang pito tanan nga sakay sang depampasahero nga jeep matapos nga nakakas ang panguna nga goma sang salakyan sa Purok Señora, Barangay Salvacion, banwa sang Murcia, Negros Occidental kahapon sang aga, Hunyo 8.
Sa interview sang Bombo Radyo Bacolod kay Police Major Sherwin Fernandez, hepe sang Murcia Municipal Police Station, nagsakay ang pamilya sa gin-arkilahan nga jeep agud nga magpadulong sa Central Philippine Adventist College (CPAC) sa Barangay Alegria, Murcia nga natalana nga magatambong sa graduation sang ila himata kahapon.
Suno kay Fernandez, apang pag-abot sa bahin sang Barangay Salvacion nakakas ang natuo nga panguna nga royda sang jeep rason nga nadulaan sang control kag nahulog sa kanal.
Suno sa hepe ang jeep ang nagabiyahe sang Handumanan-Libertad.
Mechanical error ang nalantaw nga rason sang pagkakas sang royda kag pagkahulog sang salakyan sa kanal.
Ang drayber sang jeep ang ginkilala nga si Gilbert Salumag Jr., 27 anyos, single, kag residente sang Purok Planeta, Barangay Taculing, Bacolod City.
Samtang sakay naman diri sanday Lanie, 59 anyos, resident sang Planeta, Barangay Taculing, Bacolod City; kag Yvonie, 55 anyos; Mae, 22 anyos, isa ka estudyante; Michelle, 47 anyos; Alicia, 79 anyos; Jayd, 48 anyos; kag Shella, 52 anyos, lunsay mga residente sang Brgy. Mina-utok, Calatrava, Negros Occidental.
