Nagasinggitan sang hustisya ang pamilya ni Jail Officer 1 Jayvee Jayson Vargas nga gin-ambush sa Purok Katipunan, Barangay Cabug ciudad sang Bacolod nagligad nga Nobyembre 8.
Sa press conference nga ginpatigayon sang pamilya Vargas, nagapati ini nga inosente ang iya nga bata.
Suno diri, indi deserve sang jail officer ang brutal nga pagpatay sa iya sang mga armado kun sa diin gingamitan ini sang mga high powered firearms.
Ginlaragway man sang iloy nga ang iya bata ang mabuot, matinahuron kag wala gid sang kaaway.
Gani, wala sang may maangot si Mrs. Vargas nga motibo sa pagpatay sa bata sini.
Samtang, ginpanginwala man sang iloy nga imbolbado sa iligal nga druga ang iya bata.
Paathag sini, lunsay mga alegasyon lamang ang kaangtanan sang jail officer sa illegal drug trade.
Dugang pa sang iloy nga nangin blessing in disguise ang pagka-ambush kay Vargas sa Bredco Port sadtong nagligad nga Abril bangud naklaro sang kapulisan ang pangalan sang iya bata nga wala ini sang kaangtanan sa iligal nga druga.
Sa karon, padayon nga nagapanawagan sang hustisya ang pamilya Vargas.
Nagapangayo sang bulig sa presidente kag bise-presidente sang pungsod ang iloy sang gin ambush-patay nga jail officer sa Bacolod nga mahatagan hustisya ang kamatayon sang iya bata.
Sa press conference nga ginpatigayon sang pamilya Vargas, nagapati ang iloy ni Jail Officer 1 Jayvee Jayson Vargas nga si Yvonne, nga inosente ang iya bata gani nagapanawagan ini kay Presidente Rodrigo Duterte kag Vice President Leni Robredo nga mahatagan hustisya ang kamatayon sini.
Suno kay Mrs. Vargas, tuman ka brutal ang pagpatay sa iya bata sang ini ang gin-ambush sa Purok Katipunan, Barangay Cabug ciudad sang Bacolod nagligad nga Nobyembre 8 kag indi ini nagakabagay sa iya bangud indi ini kriminal.
Nagapanindugan ang iloy nga ginapatu-patuan lamang sang istorya ang jail officer.
