Wala na nagagwa sa ila nga panimalay ang mga himata ni Negros Oriental 3rd District Representative Arnolfo Teves, bangod sa kahangawa nga sila ang maulamid matapos nga gintudlo sang mga suspetsado sa pagpatay kay Governor Roel Degamo nga ang kongresista ang mastermind sa krimen.
Pahayag ni Atty. Rommel Erames, ang legal counsel sang pamilya Teves, wala na nila ginakatingala ang pagkaulamid sang kongresista sa Degamo massacre ilabi na nga sila ang makasumpong sa politika.
Apang nagakahangawa ang pamilya sa ila nga seguridad kasubong man sa seguridad ni Congressman Teves nga yara sa karun sa Estados Unidos.
Ginakulbaan man ang mga ini sa posibilidad nga bisan sila ang madalahig kag hinali nalang padal-an sang search warrant.
Bangod sini, gin-abiso na sa pamilya Teves sa Dumaguete, City nga likawan ang maggwa sa ila nga puluy-an, ilabi na nga naglapta na ang balita sa nasyonal kag madamo sang mga malain nga reaksyon sa social media nga nagapakamalaot sa pamilya Teves.
