Ginpahayag sang pamilya ni Pearl Joy Galve nga ila ginakahangawa ang safety nila kasunod sa paghatag sang statement ni Jennifer Galve.
Sa interview sang Bombo Radyo sa pamilya ni Pearl joy, antes pa man nagpadulong si Jennifer sa National Bureau of Investigation (NBI)- Bacolod, may yara sila sang nabatyagan nga may tawo nga nagabalik-balik sa gwa sang ila balay kapin alas- 3:00 sang kaagahon.
Suno pa diri, may yara man sila sang nakita nga lalaki nga nagtambay sang kapin sa isa ka oras sa ila nga tyangge.
Sa panaysayon sini, ang lalaki ang may motorsiklo, naka-yellow nga tshirt, may kalo kag nagasuksok sang facemask.
Pahayag sang pamilya ni Pearl Joy nga ila sa karun nagakabatyagan nga sila ang ginabantayan.
Samtang, nagpasalig naman ang Bacolod Police Station 9, sa siguridad sang pamilya.
Sa interview sang Bombo Radyo Bacolod kay Police Captain Michael Tuburan, station commander sang Bacolod City Police Station 9, may yara sila sang gindeploy nga mga police personnel para magbantay sa safety sang pamilya.
Suno diri, kasunod sa pagtuad ni Jennifer sang mga impormasyon sa NBI, mas hugton pa gid nila ang security nga ihatag sa pamilya.
