BACOLOD CITY — Apisar wala sa gihapon naghatag sang sabat ang pamunuan sang The Doctors Hospital Inc., liwat nga ginpamilit sang pamilya sang 10-anyos nga bata nga nabungguan sang salakyan nga ini ang napatay matapos ginbalibaran bangud wala sang inugbayad sa downpayment.
Madumduman nga ang biktima nga si Asher Gamilla ang nabungguan sang pribado nga awto sa Camella Homes, Circumferential Road, Barangay Alijis, sadtong Marso 1.
Siya ang gindala sa Doctors Hospital apang wala ini gintatap bisan madugay na nga nagatinir sa emergency room bangud wala sang inugbayad sa downpayment nga 40 mil pesos.
Ginsaylo ini sa Corazon Locsin Montelibano Memorial Regional Hospital kun sa diin na-CT scan ang pasyente apang nagtaliwan ang bata.
Duha na ka semana ang nakaligad, wala gihapon naghatag sang sabat ang pamunuan sang Doctors Hospital.
Sa pagbalik sang Bombo Radyo, ginpahayag sang iloy nga si Anabelle Gamilla sang Purok Dubay, Barangay Alijis, Bacolod City nga nagpakitluoy sila nga ipaidalom sa CT scan ang pasyente apang wala ini natigayon bangud wala sang inugbayad sa downpayment.
Igadihon na sang pamilya ang pagpasaka sang kaso batok sa mga medical personnel nga natungdan.
Sa pagpakig-angot sang Bombo Radyo, ginpasalig sang Public Attorneys Office nga buligan nila ang pamilya nga makadihon sang affidavit agud mapasaka ang kaso.
