Ginpahayag sang pamilya sang 15 anyos nga lalaki nga nabunggoan sang Indian National nga sala ang pahayag sang hepe sang San Enrique Municipal Police Station nga may settlement na sa kaso bisan nga wala pa.
Sa interview sang Bombo Radyo kay Maria Fe Pura, tiya sang biktima nga bulag, sang Marso 2, naghulam sang motorsiklo ang iya hinablos sa stepfather sini para magpractice sa Barangay Batuan, San Enrique.
Apang, paggwa sini sa dalan amo na nga nabunggoan ini sang Indian National.
Namangkot ang mga kapulisan kun sin-o ang pamilya sang biktima apang wala sang may nanugid.
Nakig-angot ang kapulisan sa brgy Kagawad kag naghambal man ang kagawad nga may settlement na lang apang wala man sini ginpalab-ot sa pamilya sang biktima ang natabo.
Una gindala sa Don Salvador Benedicto Memorial District Hospital ang bata kag sila ang ginhamblaan nga dapat refer ini sa Corazon Locsin Montelibano Memorial Regional Hospital para sa CT scan sa ulo sini nga napurohan.
Bangod wala sang kwarta, sa karun ang hinablos sini ang yara lang sa ila balay nagahigda kag indi mamuklat ang mata bangod tuman ka sakit sang iya ulo.
Suno kay Pura, samtang nagapamati ini sa Bombo Radyo kagab-i, iya nabatian nga sala ang pahayag ni Police Major Leo Estopa, hepe sang San Enrique Municipal Police Station, nga may settlement na bangod wala man sila nakaatubang sa Indian National nga si Nadet Bukari Sigh residente sang Barangay Estefania, Bacolod City.
Dugang pa ni Pura, sala man ang pahayag ni Estopa nga may inisyal na nga bulig nga nahatag sa ila bangod wala man sila sang may nabaton.
Samtang, ginrelease naman ang Indian National nga may drivers license nga siya ang Filipino Citizen bangod may settlement na suno sa kapulisan.
