Tuman ang hilibion sang iloy sang 17 anyos nga biktima nga ginlugos kag ginpatay sang iya step-grandfather sa Barangay Magsaysay, Cadiz City samtang ini ang nagabantay sa gwa sang Cadiz City Police Station.
Ang pamilya sang biktima ang nagbantay gid sa estasyon sa pag-abot sang suspetsado nga ginkilala nga si Federico Delfin, 62 anyos matapos ini ang madakpan sa Barangay Tampalon, Kabankalan City.
Ginsecure naman sang kapulisan ang suspetsado matapos nga ini ang una na nga natampaan sang magulang sang biktima.
Sa interview sang Bombo Radyo Bacolod sa iloy sang biktima nga si Loraine Villanueva, lima ang iya kabataan kag ang biktima nga Grade 8 student ang nabilin nga yara sa iya luyo.
Siya kag ang iya partner nga step father sang biktima ang parehas nga nagatrabaho sa small planters gani sa masami ginabilin nila ini sa amay sang iya bana.
Wala naman ini nagpinsar nga himuon sang suspetsado ang krimen bangod ginapinsar sini nga apo na ang pagkabig sang senior citizen sa bata.
Dugang pa sang iloy nga wala siya nagapinsar nga ang paghatag sang senior citizen ang halos tanan nga ginapangayo sang bata ang may lain na nga kahulugan.
Aminado man ini nga ginasunod-sunod sang tigulang ang iya nga bata apang ginarasun sini nga indi niya luyag nga magnobyo-nobyo ang biktima bangod ini ang naga-eskwela pa.
May nobyo man ang biktima nga anay nagbisita sa ila, apang ini ang ginsita sang suspetsado kag ginpahog nga iya patyon kun magbalik sa lugar.
Pahayag sang iloy nga luyag sini nga ang suspetsado nalang ang magbulos sa iya nga anak nga napatay.
Desidido man ang mga ini nga ipasaka ang kaso kag luyag sang mga ini nga sa prisuhan na mapatay ang suspetsado.
Wala naman nag-upod ang stepfather sang bata sa pagbantay sa Cadiz City Police Station bangod ginpahayag sini nga mahimo mapatay niya ang iya amay.
Ginatugyan naman sini sa pamilya sang bata ang kun ano man ang luyag nila nga buhaton sa suspetsado.
Samtang gina-ampo na lamang sang stepfather sa Ginoo ang iya amay nga amo ang may kahimuan sa krimen, bangod siya ang tawo lamang kag indi makapatawad.
Sa exclusive interview sang Bombo Radyo Bacolod kay Peter Defin, 16 ka tuig na sila nga maglive-in sang iloy sang biktima nga si Loraine Villanueva, gani halos matuod-tuod nga anak naman ang pagkabig sini sa bata.
Pahayag sini nga siya tawo lamang kag mahimo indi makapatawad gani ginatanyag na lamang sini sa Ginoo ang pagpatawad sa iya amay nga si Federico Delfin, 62 anyos.
Nagalaom ini nga mabinag-binag sang iya amay ang krimen nga iya nahimo.
Aminado si Peter nga natalupangdan naman sini nga may lain sa hulag sang iya amay, bangod ginasugat sini ang bata kun diin man magpadulong.
Dugang pa sini nga masami man nga ginasinggitan sang senior citizen ang bata, kag ginabastos kun yara ang mga abyan nga kaangay nga nagaselos.
Wala gid ini nagpinsar nga patyon sang iya nga amay ang ginakabig sini nga bata.
Akig ini sa iya amay, bangod sa wala kapatawaran nga krimen kag mas luyagon pa sini nga siya nalang ang ginpatay sangsa ang bata.
Ginpasalamatan sini ang tanan nga mga nagbulig agud ma-angkon ang hustisya.
Wala naman ini nagpadulong sa Cadiz City Police Station, bilang pagtahod sa mga kapulisan, bangod wala ini nakahibalo kun ano ang iya mahimo sa iya amay.
Sa karun, luyag na lamang sini nga madul-ong sa ulihi nga palahuwayan ang iya stepdaughter.
