Pursigido ang pamilya sang 27 anyos nga special child sa Barangay Bagunawa, San Enrique, Negros Occidental nga magpasaka sang kaso batok sa punong barangay nga ginaalegar nagkastigo sa iya sang tinalikdan nga adlaw.
Sa interview sang Bombo Radyo Bacolod kay Ronilo Fernandez, magulang sang biktima, ginapahayag sini nga nagakatulog ang iya manghod sang ini ang ginpukaw ni Punong Barangay Arlo Aplasca kag ginkastigo bangud yara ini sa impluwensya sang makahulubog nga ilimnon.
Suno sa magulang, nakaagom ang iya manghod sang madamo nga bukol, nagdugo ang baba kag nagkalataktak ang ngipon.
Wala man matumod ang rason sang Punong Barangay kun ngaa ini ang nagpangastigo.
Ginpunggan man ini sang mga Barangay Tanod apang wala ini nagpasaway bangud ginapangsumbag man niya ang mga tanod.
Aminado man si Fernandez nga palalagaw ang manghod sini.
Napablotter naman sini ang natabo sa San Enrique Police Station.
Ginatinguhaan pa sang Bombo Radyo Bacolod nga mapasabat si Punong Baragay Arlo Aplasca tuhoy sa nasambit nga akusasyon.
