Nakatulog na sang mahamuok ang utod sang anay legal counsel ni former Buluan Vice Mayor kag karun Maguindanao 2nd District Congressman Esmael “Toto” Mangudadatu matapos naconvict na ang mga prime suspects.
Sa interview sang Bombo Radyo Bacolod kay Andrea Amanda Jayme, utod ni Atty. Concepcion Jayme-Brizuela, nagpasalamat ini bangud nahatagan na sang hustisya ang kamatayon sang iya utod sa makahalunusbo nga pagpamatay sa Sitio Masalay, Barangay Salman, Ampatuan, Maguindanao sadtong Nobyembre 23, 2009.
Suno diri, indi man kompleto ang kalipay nga nabatyag sini, nagpasalamat na lamang siya bangud bisan paano nangin positibo ang decision sang korte nga manabat na ang may kahimuan sa krimen.
Sa pihak sini, dismayado man ang pamilya Jayme bangud may yara sang isa sa mga Ampatuan nga nakapiyansa sadto kag nagapungko na nga alkalde sa isa ka banwa sa Maguindanao nga si Sajid Ampatuan nga na-acquit.
Nagakahangawa man ini nga sa dako nga posibilidad nga maliwat ang krimen samtang nahilway ang katapo sang pamilya Ampatuan.
Kadungan sini, ginpangamuyuan na lamang sini nga indi pagpaboran sang korte ang apela sang mga naconvict nga mga Ampatuan.
Samtang wala na sila nagapaabot nga magabayad pa ang mga ini sang damages suno man sa mandu sang korte bangud yara na sa prisuhan ang mga ini.
