Nagapangayo sang pasaylo sa pamilya ang magulang sang suspetsado nga nagkuha sang 17-day old nga lapsag sa ciudad sang Bacolod nagligad nga Lunes.
Nagalaom ang magulang ni Angelie Gonzales nga amo ang nagturn-over kay Baby William sa Police Station 1 nga mapatawad lamang sang iloy sang lapsag ang ila nga manghod.
Suno sa magulang, kuntani mahangpan sang iloy ni Baby William nga si Mary Grace Goto nga depressed lamang ang ila manghod matapos nga nahulugan ini.
Suno sa magulang, excited na kuntani nga makaangkun sang una niya nga bata si Angelie ugaling nahulugan ini.
Nagalaom ini nga makita sang iloy sang lapsag nga wala man ginpabay-an sang iya manghod si Baby William.
Samtang nagapasalamat naman ang lola ni Baby William nga si Salvacion Fernando Perez, nga luwas nga nabalik ang iya apo.
Suno kay Perez, amo lang man ini ang iya nga ginahandom kag kun siya ang pamangkuton indi na sini luyag nga magpasaka pa sang kaso batok kay Gonzales apang nagadepende gihapon sa iya bata nga si Goto ang desisyon.
Nagapasalamat man si Perez nga wala ginpabay-an sang suspetsado ang iya nga apo kun sa diin ginpamaklan pa niya ini sang mga gamit.
Una na naman nga ginpahayag ni Police Major Jovil Sedel, commander sang Police Station 1 nga kun dayunon gid sang pamilya, kaso nga abduction ang sarang mapasaka batok kay Gonzales.
