Luyag na lamang sang pamilya sang biktima nga gin-utdan sang kamot, tiil kag duha ka dulunggan nga ginbilin sa opisina sang National Bureau of Investigation Bacolod sadtong Marso 1, nga I-claim na lamang ang body parts agud mahatagan sang desente nga paglubong.
Ang nawala nga kamot nga gin-utod nagikan sa abaga tubtob sa tudlo, ang nawala nga tiil ang halin sa tuhod tubtob sa tudlo kag duha ka dulunggan ang ginbilin sang NBI office sa Aguinaldo Street, kapin alas 5:45 sang kaagahon.
Nakita sa ginsudlan sang chop-chop nga body parts ang sulat nga “William de Arca NBI protector ni Hanz Lopez drug lord”.
Sang Biyernes, na identify ang biktima nga amo si Baltazar Lamata nga residente sang Brgy. Pahanocoy, Bacolod City.
Ini ang naidentify paagi sa pagkumpara sang iya nga fingerprint sa fingerprint specimen nga ginauyatan sang NBI bangud nagkuha si Lamata sang NBI clearance antes ini namissing.
Sa interview sang Bombo Radyo sa bata sang biktima, Pebrero 27 sang naglakat ang amay sini para magbakal sang bulong bangod nga nagabatyag ini sang iya arthritis apang wala na ini mahimo pa nga makabalik.
Suno diri, mabuot ang amay sini kag wala sang kaaway.
Wala naman sang plano pa nga magpasaka sang kaso ang pamilya agud malikawan na lamang ang kinagamo, apang luyag lamang nila nga makuha ang body parts sang iya amay para mahatagan sang desente nga paglubong.
Samtang, tubtob sa karun wala pa nakita ang lawas sang biktima.
