Gindala na sa pamilya sang call center agent ang lawas sini matapos ini ginpatay sang bana nga isa ka foreign national kag yara naman sa pamilya ang lawas sang bana nga nagpanginmatay man matapos ang krimen sa ila nga balay sa Villa Mikaela, Alice Street, Barangay Singcang Airport, Bacolod City, kahapon sang aga.
Ginbuno si Liezel Demerin St. Jean sang bana sini nga si Ronald St. Jean, 55-anyos, isa ka Canadian national, kag nasaksihan sang mga kabataan sang mag-asawa nga 11-anyos kag pito ka tuig ang pagbuno sang ila amay sa ila iloy.
Apang, matapos ginpatay ni Ronald ang asawa ginlaslas sini ang iya pulso kag ginbuno ang iya kaugalingon sa dughan, rason sang iya kamatayon.
Sa interview sang Bombo Radyo kay Police Captain Glen Montano, station commander sang Bacolod Police Station 8, ginatinguhaan na sa karun sang pamilya sang babayi nga macontact ang pamliya sang bana.
Suno kay Montano, sa Canada nagapuyo ang pamilya St. Jean kag nagabakasyon diri kun sa diin sila nagarenta lamang sang balay nga matiniran, apang sa karun nagdesisyon ang pamliya nga magpuyo na gid lamang sa Villa Mikaela, Barangay Singcang Airport, Bacolod City.
Suno diri, yara na sa pamilya sang babayi ang lawas sang duha kag gina-process na ang mga insurance kag dokumento para sa duha nila ka kabataan.
Mensahe ni Montano, kun may problema sa sulod sang balay mas maayo nga istoryahan na lang agud malikawan ang amo nga insidente.
