Indi na magpasaka sang kaso ang pamilya sang college student nga napatay matapos mabungguan ang iya motorsiklo sang military vehicle sa Brgy Bulad, Isabela.
Ang napatay ang ginkilala nga si Aljun Salibio, 22 anyos, residente sang Brgy Robles, La Castellana, nga driver sang motorsiklo; samtang pilason man ang iya angkas nga si Jayvie Tupas, 21 anyos.
Ang military truck ang ginamaneho naman ni Sergeant Jimmy Matteo Pangan, 40 anyos kag ini ang may sakay nga walo ka suldado.
Sila ang mga katapo sang Charlie Company sang 62nd Infantry Battalion sang Philippine Army.
Sa interview sang Bombo Radyo Bacolod kay Police Major Hancel Lumandaz, acting chief of Police sang Isabela Municipal Police Station, nakagwa na sa ila estasyon ang driver alas-6:00 kaina sang aga sang matapos ang reglementary period.
Naka-estorya naman ang driver kag ang pamilya sang biktima, kag ang luyag lamang sang mga ini nga sila ang mabuligan.
Luwas sa driver nga nagpasalig sang bulig, nagcommit naman si Negros Occidental 5th District Representative Atty Dino Yulo nga siya na ang magasalo sang hospital bill kag pagpalubong sang biktima.
Si Isabela Municipal Mayor Miguel Yulo ang nagpasalig man nga magabulig.
Nahibaluan nga nagasunod ang military truck sa motorsiklo sang madulaan sang prino ang suldado.
Wala man sang helmet nga suksok ang biktima.
Pahanumdom na lamang ni Lumandaz sa mga nagamotorsiklo nga magsuksok gid sang helmet.
Samtang sa mga nagadala naman sang salakyan, panawagan sini nga indi magkumpyansa, mangin defensive driver, kag seguruhon gid ang maintenance sang salakyan.
