Nanugon ang pamilya sang conjoined twins sa Silay City, Negros Occidental sa pagtaliwan sang doktor sa New York nga nagbulag sa ila sang tuig 2004 bangud sa komplikasyon nga dulot sang coronavirus disease.
Si Dr. James Goodrich sa Montefiore Medical Center nga nahamtang sa Bronx, New York ang yara sa iya 70s kag nagtaliwan sang tinalikdan nga adlaw bangud sa COVID 19.
Siya ang nagpanguna sa operasyon agud mabulag sanday Carl kag Clarence Aguirre sang Hacienda Nalipao, Barangay Rizal, Silay City sang Agusto tuig 2004 kag sa karon, naga-edad na ang mga ini sang 18.
Ang kapid ang nabun-ag sang April 21, 2002 kag sang 2003, sila ang gindala sang ila iloy nga si Arlene sa Estados Unidos kag sila ang madinalag-on nga naseparar nanday Dr. Goodrich kag Dr. David Staffenberg makaligad ang masobra 12 oras nga operasyon.
Sa interview sang Bombo Radyo kay Andy Aguirre, tiyo nanday Carl kag Clarence, nagpahibalo ang iya magulang nga nagpositibo si Dr. Goodrich sa COVID gani sila ang nakibot sang ginbalita sini nga nagtaliwan na ang surgeon.
Suno kay Andy, ginakabig nila nga baganihan ang pediatric neurosurgeon bangud siya ang nangin instrumento agud nga makapangabuhi sang normal ang kapid nga nabun-ag nga nagatapik ang bagul kag utok.
Ang kapid ang labing una nga conjoined twins nga gin-uyatan sang doktor kag masami ini nagatambong sa kaadlawan sang duha.
Sa Abril 21 ang 18th birthday sang kapid kag wala na sang Goodrich nga magabisita sa ila.
Suno sa tiyo nga Aguirre, nasubuan si Arlene bangud indi sila makabisita sa pamilya sang doktor bangud nagaduging man ang COVID sa New York.
