Indi na magpasaka sang kaso ang pamilya sang motor rider nga napatay matapos nga nakabunggo sa auto sa bahin sang Circumferential Road sakop sang Barangay Villamonte sa ciudad sang Bacolod, ala 1:10 ang takna sang kaagahon, Miyerkules, Setyembre 25.
Ginkilala nga si alyas Jun, legal ang edad, kag residente sang nasambit nga Barangay.
Sa inteview sang Bombo Radyo Bacolod kay Police Major Ramel Sarona, pinuno Bacolod City Police Office- Traffic Enforcement Unit, nagikan sa norte nga bahin ang auto samtang si Jun naman ang padulong naman sa sur nga bahin sang dalan.
Suno kay Sarona, ang driver sang motorsiklo ang naga-overtake kag nagapang-agaw sang lane kun sa diin nabungguan sini ang auto.
Dugang pa ni Sarona, wala nagasuksok sang helmet ang biktima kag bangud sa impact sang pagkabunggo, nakaangkon ini sang madamo nga samad sa iya ulo kag pila ka bahin sang lawas nga gintunaan sang kamatayon sini.
Suno pa diri, nabaton na sang pamilya sang biktima nga may kakulangan ang ila nga himata sa nagluntad nga aksidente gani may yara na sang settlement.
Narelease naman ang driver sang auto kag salakyan matapos nga ang pamilya sang biktima ang indi na magpasaka sang kaso.
