Hulaton pa ang pinal nga desisyon sang iloy sang engineer nga nagtaliwan sa aksidente nga nagluntad sa Bacolod-Silay Airport Access Road sa syudad sang Talisay, Negros Occidental sang tinalikdan nga adlaw kun mapasaka ini sang kaso ukon mapa-settle nalang.
Sa interview sang Bombo Radyo Bacolod kay Police Staff Sergeant Dasilio Pachoro, imbestigador sang Talisay City Police Station, nagpadulong sa Talisay City Police Station ang tiyo sang biktima nga si Engr. Glenn John Nemenzo, residente sang Villa Angela Subd., Barangay Villamonte, Bacolod City kag ang representative sang insurance sang Bacolod Triumph Hardware kag nakaestoryahanay na sila sang driver sang wing van antes ginrelease sang Talisay City Police Station bangud natapos na ang reglementary period.
Suno kay Pachoro, nakaestoryahanay ang driver sang wing van nga si Dionesio Ygay, 34-anyos kag residente sang Barangay Bairan, Vallehermoso, Negros Oriental kag ang tiyo sang biktima kag naplastar naman ang mahimo makuha sang biktima sa insurance kasubong kun paano natabo ang aksidente.
Ipalab-ot pa sang tiyo sa iloy sang biktima ang ila naistoryahan.
Ginpahayag man ni Pachoro nga kun luyag sang iloy sang biktima nga mag-istorya sa driver kag sa iya man bilang imbestigador, sarang gid sila makapadulong sa Talisay City Police Station.
Madumduman nga nagabyahe nagikan sa south to north direction ang Toyota Hi-Lux nga ginamaneho ni Nemenzo sang nasugata sini ang Fuso wing van nga nagadalagan naman sa pihak nga direksyon.
