Ginkumpirmar sang iloy sang napatay nga 23 anyos nga engineering graduate matapos ginlasak sang truck ang tricycle nga iya ginasakyan sa Circumferential Rd., Barangay Alijis, Bacolod City tinalikdan nga Disyembre 22 sang gab-i nga nagpasaka na sila sang kaso sang Enero 18 batok sa driver sang salakyan nga una nga nagsagaid sa tricycle.
Madumduman nga halin sa training si Prince Joaquin Relatos kag pauli na kuntani sakay sa gin-arkilahan nga tricycle sang gindalasa ini sang salakyan gani naglabog ang tricycle.
Nagasunod ang truck nga may karga nga tubo gani nalasakan sini ang tricycle kun sa diin gilayon nga ginbawian sang kabuhi si Relatos.
Sa interview sang Bombo Radyo Bacolod kay Edna Relatos, iloy sang biktima, ginpahayag sini nga napasakaan na nila sang kaso nga reckless imprudence resulting to homicide si Ian Roy Hullaca, 40-anyos kag residente sang Barangay Handumanan nga driver sang Toyota Innova nga nagaduag pula kag responsable sa pagbunggo sa ginasakyan nga tricycle ni Relatos.
Suno sa iloy, sang Enero 16 lang nag-abot ang autopsy result gani nga sang Lunes lang nila napasaka ang kaso.
Dugang pa sini nga tinutuyo gid sang ila pamilya nga mahatagan sang hustisya ang iya nga bata gani nga nagpasaka sila sang kaso.
Aminado man ini nga tubtob subong indi pa gid nila mabaton ang kamatayon ni Relatos.
Suno sa iloy, atubangon nalang ni Hullaca ang kaso para mahatagan sang hustisya ang kamatayon sang biktima.
