Nagapangayo sang hustisya ang iloy sang engineering graduate nga ginbawian sang kabuhi sa aksidente nga nagluntad sa Circumferential Rd., Barangay Alijis, Bacolod City sang Disyembre 22.
Madumduman nga gilayon nga ginbawian sang kabuhi ang engineering graduate nga si Prince Joaquin Relatos, residente sang Barangay Mansilingan, Bacolod City nga pauli na kuntani sakay sa gin-arkilahan nga tricycle sang ginsagaid ini sang gina-alegar pick-up gani naglabog ang tricycle.
Nagasunod ang truck nga may karga nga tubo gani nalasakan sini ang tricycle kun sa diin gilayon nga ginbawian sang kabuhi si Relotos.
Pilason naman ang driver sang tricycle nga ginkilala kay Wilmar De Asis.
Sa interview sang Bombo Radyo Bacolod kay Edna Relatos, iloy sang biktima, ginpahayag sini nga tubtob subong nagahulat sila gihapon nga magsungka ang driver sang pick-up bangud wala gid ini nagpakita apisar nga tuman kadako ang halit nga iya nahimo.
Suno diri, luyag nila mahatag sang hustisya ang kamatayon ni Prince Joaquin gani nagahingyo ini nga ulikdon ang iya nahimo bangud kadako pa kuntani sang puturo sang biktima.
Nagapangayo man ini sang bulig maskin para na lang sa punerarya bangud madako ang ila gasto.
May yara man ini sang contact number sang driver sang truck nga sa karun nakagwa na matapos ang reglementary period apang wala man nagpakig-angot ang iloy diri.
Ginkumpirmar naman ni Police Lt. Conrado Espino, hepe sang Bacolod Police Station 7 nga ila na natumod ang logo sang salakyan nga nagbunggo sa tricycle.
Suno kay Espino, ila ini gintestingan sa Toyota Avanza, Hilux kag Fortuner apang wala ini nagmatch kag sang ila gintestingan sa Innova, didto nag-igo ang logo.
Suno diri, may yara sang registered code ang logo kun ano nga number ang nakabutang diri gani ila pa ini hibaluon.
Nakahatag naman suno sa iya sang affidavit of undertaking sa driver sang truck kag depende na sa pamilya kun magapasaka sila sang kaso.
