Wala na nagpasaka sang kaso ang pamilya sang menor de edad nga yara sa computer shop nga nabungguan sang truck nga may karga nga tubo sa Purok 9, Brgy Minoyan, banwa sang Murcia, sang Mayo 15 sang hapon.
Madumduman nga isa ka menor de edad ang napatay sa nagluntad nga insidente.
Sa interview sang Bombo Radyo Bacolod kay Police Major Sherwin Fernandez, hepe sang Murcia Municipal Police Station, wala na nagpasaka sang kaso ang pamilya sang mga menor de edad nga biktima sang insidente.
Suno kay Fernandez, ang pamilya sang mga biktima kag ang driver sang truck ang naghimo sang kasugtanan nga ginsubscribe man sang abugado.
Ang kasugtanan ang ginhatag sa mga kapulisan kun sa diin nagexecute ang mga ini sang affidavit of non-interest ukon indi na ang mga ini magpasaka sang kaso batok sa driver.
Suno diri may settlement na sa magtimbang nga bahin kag ang driver kasubong man ang tag-iya sang truck ang naghatag man sang bulig sa pamilya sang mga biktima.
Ang driver ang ginrelease naman sang Murcia Municipal Police Station sang matapos ang reglementary period.
Nahibaluan nga dulhogon ang dalan kag paglab-ot sa kurbada, nadulaan sang kontrol ang drayber sang truck kun sa diin nabunggoan sini ang computer shop.
