Ginahulat pa kun may mahuman nga settlement sa tunga sang tag-iya sang truck kag sang pamilya sang duha ka kabataan nga napatay sang mabungguan sang truck sang tubo ang computer shop sa Purok 9, Barangay Minoyan, Murcia.
Nahibaluan nga napatay ang 14 kag 15 anyos nga solterito sa nasambitan nga insidente kahapon pasado alas-3:00 sang Huwebes sang hapon.
Sa interview sang Bombo Radyo Bacolod kay Police Major Sherwin Fenandez, hepe sang Murcia Municipal Police Station, napamatud-an nila mismo sa pagkadto sa lugar nga aksidente ang natabo.
Indi man overloaded ang 10-wheeler truck nga ginamaneho ni Alyas Jerry, 50 anyos, residente sang Prk. Humayan, Brgy Mailum, Bago City.
Suno kay Fernandez, magluwas nga dulhugon ang dalan, may-ara sang sharp curve kun sa diin nahamtang ang compiuter shop.
Aminado man ang driver nga ini ang makapila na maglabay sa lugar, kag sa masami kun ini ang may karga, nagakinahanglan pa nga mag-atras agud makaliko bangod mahimo nga maglapaw ang truck sa taytay kag saba nga yara lamang sa unahan.
Sa nasambitan nga tion, magamanuevre na kuntani ang driver kag sa pagshift sini sang kambyada, wala nagkagat ang iya prino kag nagderetso sa computer shop kun sa diin nagahampang ang duha ka bata.
Suno kay Fernandez, may una na nga pag-estoryahanay ang pamilya sang mga biktima kag ang tag-iya sang truck.
Una naman nga nagtanyag ang tag-iya sang truck nga sila ang handa nga magbulig kag sabtun ang pagpalubong sa mga biktima.
Nagpahayag naman ang nalisdan nga pamilya nga ila pa nga paminsaran ang mangin desisyon.
