Nagrally ang pamilya sang mga person’s deprived of liberty (PDL) sang Negros Occidental District Jail sa atubang sang Bureau of Jail Management and Penology – Negros Island Region sa reklamo nga indi manami nga patakaran sang jail warden nga si Jail Chief Insp. Crisyrel Awe.
Suno kay Alyas Inday, asawa sang isa ka PDL, kun kaisa pan-os ang pagkaon sang mga PDLs kag kun kaisa may mga insekto pa.
Sang nagreklamo nga pnn-os ang ila pagkaon, ginbawi ini sa mga PDLs kag ginhatagan sila sang uga kag sila ang ginpaluto.
Suno diri, magbisita siya sa iya bana, ginapa-uba siya, ginpatuwad kag ginapatumbo pa.
Dugang pa sini, ginbuhinan pa ang sunning time sang mga PDLs.
Pahayag ni alyas Inday, sadto ang iban nga jail warden indi man gid strikto apang sa karun para sa iya sobra-sobra na gid si Awe.
Suno pa diri, iban sa mga preso wala man sang sala kag mga inosente apang napreso lang bangod napasibangdan. SAMTANG…nagpatigayon sang hunger strike ang mga person’s deprived of liberty (PDL) sa Negros Occidental District Jail subong nga adlaw sa panawagan nga pahalinon na si Jail Chief Insp. Crisyrel Awe bilang jail warden.
Sa interview sang Bombo Radyo Bacolod kay Jail Senior Inspector Juniven Umadhay, spokesperson sang Bureau of Jail Management and Penology – Negros Island Region, nabaton sini ang report nga nagpatigayon sang hunger strike ang PDLs kun sa diin wala sila nagkaon subong nga adlaw kag may rally nga ginpatigayon ang mga pamilya sang preso sa atubang sang BJMP -NIR.
Suno diri, amo man sa gihapon ang ila panawagan kaangay sang nakaligad nga pahalinon si Jail Chief Insp. Crisyrel Awe bangod tuman na gid ka strikto ang patakaran sa NODJ.
Pahayag ni Umadhay, sadto may ebidensya nga may nakuha nga illegal nga droga sa sulod amo nga mas ginhugtan pa gid ang security.
Suno diri, ginasiguro pa gid nila nga wala sang may mapasulod nga firearms ukon ano man nga kontrabando.
Ginbuhinan man ang sunning time sang PDLs para mamonitor ang ila giyo.
Madumduman nga sang Agosto nagpatigayon sang noise barrage ang mga PDLs sa panawagan nga pahalinon si Awe.
Kasunod sini, nanaog si Awe sa pwesto samtang may ginapatigayon nga imbestigasyon.
Matapos ang imbestigasyon, wala sang may nakit-an nga sala nga ginhimo si Awe kag siya ginbalik bilang jail warden.
