Ginpasalamatan sang magulang sang dalagita nga namissing sa Barangay Sum-ag Bacolod City ang mga nagbulig agud makit-an ang iya manghod sa Bantayan Park sa Bago City, Negros Occidental.
Sa interview sang Bombo Radyo Bacolod kay Alexandra Aplasca, magulang sang namissing nga si Sabrina Amanda Cumbalon alyas Sab, ulihi nga nakita ang dalagita sa Purok Providence, Brgy Sum-ag.
Ginreport naman nila ini sa Bacolod Police Station 9, apang indi paman makahulag ang mga kapulisan bangod wala pa mag-24 oras.
Gincontact man nila ang mga classmates kag abyan sang 12 anyos nga dalagita, kag ginpadulungan ang iya nobyo nga ila man ka-Barangay, apang wala sang may nakahibo kun diin ini.
Madamo man sang mga nagshare sa social media sang mga post tuhoy sa pagkadula sang dalagita.
Suno kay Aplasca, alas-2:44 kaina sang kaagahon, may nagchat sa iya tiyo nga si Phil Rodriguez nga nagapahayag nga nakita ang dalagita sa Bantayan Park.
Apang ini ang nabasahan nila pasado alas-6:00 na sang aga.
Suno kay Aplasca, nakit-an sang grupo sang mga pamatan-on si Sab nga naga-isahanon sa Bantayan Park.
Bangod nakita nila ang post sa social media gani nagcontact sila sa tiyo sang dalagita.
Gindala man sang isa sa mga pamatan-on si Sab sa ila balay, kag ini ang temporaryo nga ginsapupo sang pamilya bangod indi man nila luyag nga papulion ang bata nga gab-i na.
Pasado alas-7:00 sang aga, natigayon nga masugat ang dalagita.
Nahibaluan nga ginlakat lamang ni Sab ang Barangay Sum-ag padulong sa Bago City.
Sang ginpamangkot kun siya ang may problema, wala man ini sang may ginasugid.
Nahibaluan nga bwas, Abril 5 ang ika-13 nga kaadlawan ni Sab.
Dako ang pasalamat sang magulang nga mabuot nga mga pamatan-on ang nakakita kay Sab, subong man sa mga nagsapupo sa iya nga pamilya kag mga nagshare sang ila panawagan sa social media.
