Wala mahatagan sang ginapangayo nga medical record ang pamilya sang napatay sa Bago City Hospital, bangod sa ginapahayag confidentiality sang dokumento.
Nahibaluan nga nagtaliwan si Cyrene Tolosa Gersala, kasado, may tatlo ka kabataan kag residente sang Brgy Busay, Bago City sang Pebrero 26 matapos sang gina-alegar pagpatumbaya sang ospital sa pasyente.
Una na nga ginpahayag sang pamilya nga naaksidente ang biktima sang Pebrero 22 kag nakaangkon sang pilas sa paa.
Gindala ini sa ospital kag ginhambalan sang doktor nga kinahanglan operahan, nga ginschedule Pebrero 28.
Apang sang Pebrero 26, hinali nalang ini nga ginhilanat, nga ginpainom sang duha ka paracetamol apang ang biktima ang nakaangkon sang kabudlayan sa pagginhawa.
Ginbutangan man sang oxygen si Gersala, apang nagrequest na ang pamilya nga madala sa emergency room ang biktima, apang wala gincater sang doktor bangod ini ang may oxygen na.
Sang madulaan sang pulso ang biktima, ang utod ang gilayon man nga ginpapirma sang waiver agud matubuhan, kag amo palang naghulag ang doktor nga sang umpisa nagasugo lamang sang nurses.
Dugang pa sang pamilya nga bisan wala na sang kabuhi, ginpadayun ang pagrevive sa biktima tubtob naghabok na ang ulo kag tiyan sini.
Nakita sa death certificate nga fat embolism ang rasun sang kamatayon sang biktima.
Sa latest interview sang Bombo Radyo Bacolod kay Kerr Tipawan Tolosa, manghod sang biktima, nagbalik ang iya iloy sa Bago City Hospital kag may na-estorya nga doktor agud kuntani makakuha sang kopya sang medical record sang napatay.
Apang wala ini ginhatagan bangod suno sa nasugilanon sini, ang doktor lamang mismo sang pasyente ang dapat nila nga kuhaan.
Paathag sang hospital staff nga indi nila mahatag ang dokumento bangod ini ang confidential, kag ginpanindugan nga makita na sa death certificate ang kinamatay sang biktima.
Suno kay Tolosa, sila ang nakig-angot na sa Public Attorney’s Office sa paghimo sang letter para sa pagrelease sang medical record sang ila pasyente.
Sa pihak nga bahin, nadayun na subong nga adlaw ang presentasyon sang fact-finding team kay Bago City Mayor Nicholas “Nico” Yulo apang ini ang wala pa makapagwa sang sabat sa isyu.
