Padayon pa sa gihapon ang imbestigasyon sang kapulisan angot sa pagpatay sa negosyante sang baboy matapos gintiro sang mga suspetsado nga nagasakay sa motorsiklo sa dalan Araneta, Purok EZ Yulo, Barangay Sum-ag, ciudad sang Bacolod kahapon sang hapon.
Sa interview sang Bombo Radyo kay Bacolod City Police Office spokesperson P/Lt. Col. Ariel Pico, ginpahayag sini nga dako gid ang mabulig sang CCTV camera nga nahamtang sa isa ka gasoline station sa imbestigasyon sa kamatayon ni Randolf Domingo, 38-anyos kag residente sang Purok Alunan Baybay, Barangay 35 sa amo nga ciudad.
Suno kay Pico, na-cover gid sang CCTV camera ang bilog nga crime scene halin sa kun diin nangihi ang biktima tubtob sa gintiro ini.
Apang wala matigayon nga malantaw ang CCTV footage bangud nalimtan sang nagabantay ang password.
Suno kay Pico, dako gid ang mabulig sang CCTV footage agud matumod ang mga suspetsado bangud ginapahayag sang mga nakasaksi nga naka-shorts kag t-shirt kag naka-facemask lamang ang mga ini kag wala sang helmet.
Samtang, narekober naman sa compartment sang salakyan ni Domingo ang isa ka KG-99 machine pistol, 15 ka mga bala sang .9mm nga yara sa magazine, isa ka bala sang .9mm kag isa pa gid ka bala sang caliber .45 pistol.
Suno kay Police Lt. Jonito Pastrana, hepe sang Police Station 9, ginapatihan nga ang biktima ang nagapanag-iya sang mga ini.
Apang, wala naman sang ihibalo ang asawa kag iloy ni Domingo nga may armas siya santo sa pagpamangkot sang kapulisan.
Sa kaangot nga balita, ginpanindugan sang pamilya sang negosyante sang baboy nga si Randolf Domingo nga wala sang kontra ang biktima nga mahimo tutukan nga anggulo may kaangtanan sa pagpatay sa iya kahapon sang hapon.
Sa interview sang Bombo Radyo sa asawa ni Domingo nga si Arlene Dominggo, madugay na ang negosyo sini nga baboy, sumugod palang sa ginikanan sini.
Suno diri, ang mga ginikanan sini ang nagakontrata sa pagkwa sang baboy samtang sila naman nga mag-asawa ang naga-ihaw.
Suno diri, wala man ini sang naka-away kag mainabyanon gani ginalantaw sini nga hisa ang kabangdanan sang pagpangluthang.
Gin-ako naman sini nga napriso ini sadto sa kaso nga visiting drug den apang nahilway matapos ang siyam ka bulan paagi sa plea bargaining agreement.
Ang mag-asawa ang may duha ka mga kabataan nga naga-edad 13, 11, 8 kag isa ka tuig.
Kahapon, nasaksihan nila sang iya iloy ang krimen kun sa diin nagtamwa pa sa salakyan ang mga suspetsado apang sila ang nagpangurumbot sang habol.
Suno diri, ang suspetsado ang nagasuksok sang T-shirt, naka-facemask nga itom kag wala man sang helmet.
Suno naman sa iloy sang biktima nga si Jane Lyn, hisa ang ginalantaw niya nga motibo sa krimen bangud wala man sang kontra ang iya anak.
Aminado ini nga indi gid mapaiway ang indi pag-intindihanay.
Ginatugyan naman sini sa Makaako ang krimen kag ang kabataan sang biktima nga lunsay magagmay pa.
