Padayon ang panawagan sang mga pamilya sang mga person’s deprived of liberty (PDL) sa Negros Occidental District Jail (NODJ) nga bag-uhon ang tuman ka estrikto nga mga pagsulundan sa sulod sang jail facility.
Boluntaryo naman nga nanaog sa pwesto bilang Jail Warden si Jail Chief Inspector Atty Crisyrel Awe agud mahatagan sang ligwa kag indi maka-impluwensya sa imbestigasyon, samtang ginbutang naman nga officer-in-charge si Jail Senior Inspector Raymund Aro.
Kahapon may yara sang ginpatigayon nga noise barrage ang mga PDL’s bilang panawagan sa pagpahalin kay Awe.
Suno sa iloy nga si Nene, kapin apat ka tuig na nga napreso ang iya bata nga lalaki sa kaso nga murder.
Suno diri, nagapuyo siya sa banwa sang Manapla kag nagabyahe padulong sa ciudad sang Bago kada Sabado agud dal-an sang pagkaon kag kwarta ang iya bata.
Pahayag ni Nene, kun may dala sila nga kwarta ginahatag nila ini sa gwardiya kag hatagan sila sang papel depende kun pila ang ila kwarta.
Mabudlay man para sa ila bisan magbakal sa sulod bangod kada hulag nila may yara sila dapat sang upod nga gwardiya.
Nagapanugid ang iya bata nga tuman na gid ka strikto sa sulod kag naga-ayo nga dal-an siya sang pagkaon.
Samtang, suno naman kay Uber, asawa sang isa sa mga PDL, ang patakaran sa sulod sang NODJ naglain na kag indi na manami.
Suno diri, sadto bisan papaano may kalipayan pa ang mga PDL’s apang sa karun halos indi na sila maayo makahulag.
Ang bana sini ang ginpriso bangod sa kaso angot sa illegal nga druga kun sa diin natirohan pa ini sa drug buybust operation nga ginpatigayon batok sa iya.
