BACOLOD CITY — Nagaduda ang pamilya ni Norberto Lumayno nga mga New People’s Army (NPA) ang responsable sa pag-ambush sa iya kag sa driver sini nga si Danilo Braga sa Brgy. Minapasok banwa sang Calatrava, Huwebes sang aga.
Sa interview sang Bombo Radyo kay Raul Baterna, ang bayaw sang napatay nga planter, nagaduda sila nga mga NPA ang nag-ambush sa mga biktima, ini matapos nga may nakit-an nga mga backpack kag mga dokumento sa ginluntaran sang engkuwentro sa tunga sang 62nd Infantry Battalion kag ginapahayag NPA.
Nagaduda si Baterna nga “diversionary tactics” lamang ini sang mga responsable sa krimen bangud kun NPA gid man ang mga ini, kuntani wala nila ginbilin ang mga importante nga kagamitan.
Dugang pa sini nga kun NPA gid man ang nagpatay sa mga biktima gin-claim na sang mga ini ang hitabo pinaagi sa radyo kag telebisyon.
Sang una, suno kay Baterna gin pabangod man sa mga NPA ang ginhimo nga pag-raid sa security guard sang duta sang iya bayaw apang sang ulihi napamatud-an nga mga “goons” nga mga barangay officials sa bukid ang responsable sa insidente.
Para kay Baterna, luyag lamang sang mga suspetsado nga ilikaw ang imbestigasyon sang otoridad.
Ginkumpirmar sang bayaw nga sa maabot nga Lunes magareklamo sa National Bureau of Investigation (NBI) ang asawa ni Lumayno.
Gin-ako man ni Baterna nga gina-pahog ini sa karun nga siya naman ang i-sunod, apang suno diri wala siya nahadlok sa nasambit nga pamahog.
