Magapadulong sa ciudad sang Bacolod subong nga adlaw ang pamilya sang security guard nga ginpatay sa Purok Zone 1, Barangay Handumanan, Bacolod City sang Enero agud nga magproseso sang temporary death certificate agud nga mapalubong ini.
Madumduman nga nagdangop sa “Ipa Bombo Ta!” segment sang Bombo Radyo Bacolod ang iloy sang napatay nga si Arnold Caballes bangud indi pag-ihatag sang ka live-in sang iya anak nga si Dholly Malalu-an ang original copy sang death certificate sang napatay.
Sa interview kay Leo Esique, pakaisa ni Arnold Caballes, nagpabulig man sa iya ang iloy ni Arnold agud nga maproseso ang dokumento kag mapalubong na ang biktima.
Suno kay Esique, ginbuligan na sini ang iloy bangud daw kaangay nga wala na ini sang insakto nga paminsaron bangud sa kasubo sa pagkadula sang iya nga bata.
Suno sa pakaisa, ginpahayag nagacontact ang live-in partner sa mga utod ni Caballes apang indi sini paghatag ang ginapangayo nga dokumento bangud luyag sini nga didto sa puder niya ang bangkay sang biktima.
Gin-abisuhan naman sang pinuno sang Local Civil Registrar ang pamilya sang biktima nga mahimo sila nga magproseso sang ila temporary death certificate agud nga malubong lamang ang biktima.
Suno kay Atty Hermilo Pauyon, makadto lamang sila sa barangay kun sa diin napatay ang biktima agud magpangayo sang cerfication kag dal-on sa permits division sa ciudad sa Government Center para sa permit sang transfer of cadaver.
Suno diri, permit sang transfer of cadaver lang sang bangkay ang kuhaon kag kun sa diin na nga local government unit ilubong magakuha sang burial permit.
