Wala sang natabo nga settlement sa tunga sang pamilya sang 15 anyos nga nabungguan sang Indian National sa Barangay Batuan, San Enrique, Negros Occidental.
Sa interview sang Bombo Radyo Bacolod kay Marife Pura, tiya sang menor de edad, nakaatubangay na sila sang indian national nga si Nadet Bukari Singh residente sang Barangay Estefania, Bacolod City kag nagtanyag sang P15,000 para sa pagpabulong sa hinablos sini apang wala ini magsugot bangud luyag sini nga suportahan ang medications kag pagpaospital sang bata .
Suno diri, kun nagpasugot sila kag ginbaton ang P15mil wala na dayun sang labot ang nakabunggo.
Suno sa tiya nagapasalamat lamang ini nga nadala na sa Corazon Locsin Montelibano Memorial Regional Hospital agud nga mabulong bangud indi mamuklat ang mata sang bata bangod sa tuman ka sakit sang iya ulo.
Suno kay Pura kun ang indian national ang indi magbulig wala na ang mga ini mahimo kundi itugyan nalang ini sa kaitaasan.
Samtang ginkumpirmar man sang hepe sang San Enrique Municipal Police Station nga wala sang settlement nga natabo sa tunga sang magtimbang nga bahin.
Suno kay San Enrique Municipal Police Station Chief Police Major Leo Estopa, nag-atubangay na ang tiya sang biktima kag ang Indian National apang wala sang agreement nga natabo.
Suno kay Estopa, wala nagpasugot ang tiya sang menor de edad nga P15,000 lamang ang ihatag sang Indian National bangud kulang ini apang nagpahayag man ang foreign national nga ini lamang ang iya masarangan.
Gin-assists naman sang mga pulis ang biktima agud madala sa Corazon Locsin Montelibano Memorial Regional Hospital agud nga ma-CT Scan kag mahibaluan kun sa diin nagahalin ang pagsakit sang ulo sini nga rekomendasyon man sang Don Salvador Benedicto Memorial District Hospital.
