Ginalauman na ni Pamplona Mayor Janice Degamo, ang balo ni late Negros Oriental Governor Roel Degamo, nga himuon sang legal team ni expelled Congressman Arnolfo “Arnie” Teves Jr. ang tanan agud indi mapapauli sa Pilipinas.
Ini kasunod sang pending nga request sang kampo ni Teves nga mahatagan sang political asylum sang gobyerno sang Timor Leste.
Madumduman nga naaresto na ang anay Kongresista matapos ginpanaog sang International Criminal Police Organization (INTERPOL) ang Red Notice batok diri.
Sa interview sang Bombo Radyo Bacolod sa alkalde, may kaangay na nga apelasyon sadto si Teves sa gobyerno sang Timor Leste, apang ini ang ginbasura.
Normal naman sa paglantaw sini ang ginahimo sang kampo ni Teves nga pagpangita sang tanan nga legal strategy agud lamang indi mapapauli sa Pilipinas ang anay konsehal.
Ini bangod may-ara sang ginakahadlukan si Teves.
Ginakatingala naman ni Degamo kun paano nga ang gina-alegar sini manugpatay sang tawo, ang makabatyag pa sang kahadlok.
Wala naman ini namag-o sa mga alegasyon nga ginatinguhaan sang kampo ni Teves nga bayaran ang Timor Leste government.
Suno diri, nakita sa mga napatigayon nga Senate hearing nga nabayaran na ni Teves ang mga kapulisan sadto sa Bayawan City, Negros Oriental, gani ginapangapinan ang mga krimen sini.
Dugang pa ni Degamo nga indi lamang sa ciudad sang Bayawan, nakabatun man ini sang impormasyon nga madamo pa sang mga matag-as nga opisyal sang kapulisan nga ginabayaran sang anay konsehal.
Gani wala na ini nagakatingala sa alegayon sang bribery sa Timor Leste, bangod himuon sini ang tanan makaangkon lamang sang asylum bisan pa sa illegal nga pamaagi.
Gintawag man sini nga puti itlog ukon talawagan si Teves, bangod sa indi pag-atubang sa kaso.
Aminado ang alkalde nga may tion nga daw mangutos naman ini bangod sa madugay nga pagpapauli kay Teves, apang ini ang nagapangamuyo na lamang nga mahatagan pa sang malawig nga pasensya.
Ginatahod man sini ang proseso sang Timor Leste, kag ini ang nagapati nga himuon sang gobyerno ang nagakaigo.
