Ginpahayag ni Pamplona Mayor Janice Degamo, nga antes paman ginpatay ang iya nga bana nga si Negros Oriental Governor Roel Degamo, may mga natalupangdan na sila nga mga makaduluda nga persona sa ila palibot.
Aminado ang alkalde nga tuman ang ila paghalong antes paman ginproklamar sang Commission on Election (Comelec) ang pagpungko sang biktima bilang gobernador, apang sila ang nagkulukampante na sang damlag lamang.
Pahayag ni Mayor Degamo nga sang Sabado sila ang may natalupangdan nga makaduluda nga persona, bangod sang ini ang ginpalapitan sang ila nga abyan nga ex-army, hinali nalang ini nga nagdalidali palayo.
Naglahog pa sila nga ini ang kaupod sang ila kontra sa politika.
Apang matapos natabo ang pagpatay kahapon, ginalantaw sini nga mahimo kabahin ini sa plano kag kun wala man natabo ang pagpang-atake kahapon, ini ang mahimo man buhaton subong nga Domingo kun sa diin sila ang masami nga nagapadulong sa simbahan.
Suno kay Mayor Degamo, antes ang proklamasyon sa pagkagobernador, may nagpaandam na sa iya nga bana sa paghalong.
Apang bangod nangin sentimental si Governor Degamo sa pagbalik sa opisina, liwat sini nga ginbuksan ang balay para sa mga tawo sa adlaw sang Sabado bangod panindugan sini nga wala siya nakabalik sa pwesto kun indi bangod sa mga pumuluyo.
Paathag ni Mayor Degamo, luyag kuntani sang gobernador nga Sabado kag Dominggo ang pag-entertain sa ila balay, apang gin-ayo sini sa bana nga ihatag ang Domingo sa Ginoo kag sa ila pamilya.
Nagapati ini nga malinong nga kumunidad ang Negros Oriental apang may-ara lamang sang mga yara sa gahom nga luyag ini nga puhagon ang probinsya.
Dako ang pagpati sini nga ginpatay ang iya nga bana bangod ginakontra sini ang mga nagahatag sang kahadlok sa mga pumuluyo, kaangay lamang sa mga tuyo nga magpasulod sang iligal nga armas sa Negros Oriental sang damlag lamang nga nabalabagan sang gobernador.
Ginpasalig naman sa iya ni Department of the Interior and Local Government (DILG) Secretary Benhur Abalos nga tinguhaan nila nga mahatag ang hustisya.
Ginkumpirmar man ni Mayor Degamo nga ang mga nagkaladakpan amo mismo ang nagsulod sa ila nga puluy-an kag nagbuhat sang kremin.
Mensahe sini sa mga residente sa Negros Oriental nga ihatag nila ang hustisya indi lang para kay Governor Degamo kundi sa tanan nga mga nangin biktima sang mastermind sa krimen.
