Gin-anunsyar ni Governor Eugenio Jose “Bong” Lacson nga pagasiraduhan ang tanan nga pampubliko nga sementeryo sa Negros Occidental halin Oktubre 30 tubtob Nobyembre 2.
Sa interview sang Bombo Radyo kay Lacson, ginpahayag sini nga sa ila ginpatigayon nga virtual meeting kahapon, nahisugtan sang tanan nga mga alkalde sang mga ciudad kag banwa sa probinsya nga suspendihon ang selebrasyon sang tigkalalag agud malikawan ang mass gathering.
Ginatsekyar pa man sang gobernador kun sarang man ini nga ma-impose sa mga private cemeteries apang kun indi, nagalaom ini nga magkooperar ang pribado nga mga patyo kag sila na lang ang magahimo sang inisyatibo agud indi na maglapta pa ang virus.
Suno kay Lacson, obvious naman ang rason kun ngaa suspendihon ang selebrasyon sang tigkalalag gani nagalaom ini nga kun indi ang mga ini masakop sa iya ipagwa nga executive order, sila na lang mismo ang magahimo sang tikang.
Suno sa iya, paagi sa pagsuspendi sang selebrasyon sang tigkalalag, mas maganubo ang posibilidad nga magalapta ang virus.
Sa karun, wala pa nakapagwa sang executive order ang gobernador angot diri.
Samtang, ginpirmahan ni Governor Eugenio Jose “Bong” Lacson ang Executive Order No. 44 Series of 2020 tuhoy sang extension sang modified general community quarantine (MGCQ) sa bilog nga probinsya sang Negros Occidental tubtob Setyembre 30, 2020.
