Hugot nga ginakondenar sang pamunuan sang Police Regional Office (PRO-6) ang pagpalupok sang anti-vehicle land mine sang New People’s Army (NPA) sa security convoy sang 1st Iloilo Provincial Mobile Force Company sa Brgy. Singon, Tubungan, Iloilo.
Sa statement nga ginpaguwa ni PRO-6 Director Police Brigadier General Rene Pamuspusan, ginakondenar niya ang nangin akto sang NPA kag ginpahayag nga isa ini ka “blatant violation” ukon paglapas sa ginapatuman nga holiday ceasefire sa tunga sang pwersa sang gobyerno kag sang komunista nga grupo.
Sa nahibaluan nga humalin alas-12:00 kahapon sang kaagahon, nagsugod na ang holiday truce nga ginhisugtan sang gobyerno sang National Democratic Front of the Philippines (NDFP) kag sang Pilipinas kag magalawig ini sang 15 ka adlaw.
Nahibaluan nga napilasan sa insidente sanday Police Staff Sergeant Ian John Lindo kag Patrolman Eric Galve kag kabahin sila sang walo ka sakay sang back to back police patrol, apang yara na sila sa maayo nga kahimtangan sa karun.
