BACOLOD CITY-Opisyal na nga ginlunsyar kahapon ang 2020 Panaad sa Negros Festival nga hiwaton sa maabot nga Abril 20 tubtob 26.
Suno kay Governor Eugenio Jose Lacson, handa sila nga ikanselar ang kahiwatan kun padayon sa gihapon ang pamahog sang 2019 novel coronavirus ukon COVID-19 tubtob sa bulan sang Abril.
Suno kay Lacson, magadepende sa sitwasyon kun madayon ini apang sa karon, todo panghanda na sila para sa Panaad Festival nga ginakabig mother of all festivals sa probinsya.
Samtang, ginkumpirmar naman ni Board Member Rommel Debulgado, chairman sang committee on finance sa Sangguniang Panlalawigan nga gin-aprubahan na sa session kahapon ang hingyo sang gobernador nga magahatag sang tag-P200,000 nga bulig-pinansyal sa mga local government units sa probinsya para sa Panaad Festival.
Nahibaluan nga magluwas sa P200,000 nga ihatag sa 12 ka mga ciudad kag 19 ka mga munisipalidad sa Negros Occidental, may ginpa-in naman nga pondo nga 12 million pesos nagikan sa 2020 General Fund kag P13 million nagikan sa supplemental fund sang probinsya.
