Opisyal na nga ginbuksan ang Panaad sa Negros Festival 2025 sa Panaad Park and Stadium, Barangay Mansilingan, Bacolod City kagab-i, Marso 24.
Ang inagurasyon ang ginpangunahan ni Negros Occidental Governor Eugenio Jose “Bong” Lacson kag gintambungan man ini sang mga alkade sa tagsa ka Local Government Unit sa probinsya sang Negros Occidental kasubong man sa ciudad sang Bacolod.
Sa mensahe sang gobernador sa subong nga tuig ang tema sang kapiyestahan amo ang “The Future Unfolds” kun sa diin nagapakita sang pagpati sang tanan sa potensyal sang mga pumuluyo para sa palaabuton sang probinsya.
Ang Panaad sa Negros ang indi lamang isa ka Festival bangud ini ang nagapakita sang heritage, resilience spirits kag shared aspirations.
Ini man ang lugar kun sa diin ang 32 ka mga LGUs ang magapakita sang pinasahi nga produkto kag estorya sang tagsa mga banwa kag ciudad.
Ang nasambit nga kahiwatan ang nagadumdom lamang sa iya nga husto ang desisyon sini nga maghatag sang tiyempo kag tanan nga ikasarang sa pagserbe sa probinsya.
Ginpasalamatan man sang gobernador ang tanan nga mga naghimo sang ila bahin agud nga matigayon ang opening sang Panaad sa Negros Festival 2025 ang mother of all festival sa probinsya sang Negros Occidental.
Gindeklarar naman nga Champion sa Panaad sa Negros Festival 2025, Best of Festival Dance Competition ang banwa sang La Castellana, 1ST Runner Up ang banwa sang Manapla, 2nd Runner Up ang banwa sang Calatrava, 3rd Runner Up ang banwa sang Murcia kag 4rth naman ang banwa sang Salvador Benedicto.
