Suportado sang pamunuan sang Bacolod City Police Office ang ginaduso sang Philippine National Police (PNP) sa pagpanguna ni PNP Chief Police Gen. Nicolas Torre III ang paggamit sang mas madamo nga mga body worn camera nga konektado sa Camp Crame.
Sa press conference ni BCPO Director Police Col. Joeresty Coronica, prayoridad sang Chief PNP ang paggamit sang teknolohiya sa policing nga ginlakipan sang pagsuksok sang body worn camera nga may application nga maview sang Camp Crame ang nagakatabo sa ila operasyon.
Suno kay Coronica, paagi man sa body worn camera makita kun nakaabot sa area ang mga police sa sulod sang tatlo ka minutos sa tion nga magresponde bangud ginaduso man sang Chief PNP ang 3 minutes response.
Suno sa BCPO Director achievable man ini sa bahin sang BCPO kag seryoso man sila sa paglab-ot sini.
Ginpahayag man sini nga madugay naman sini ginahambal nga dapat ang pagresponde sang mga kapulisan ang swift.
May patigayunon man sila nga realignment agud matuman ang 3-minuntes response bangud indi man madamo ang resources sang BCPO indi kaangay sang National Capital Region Police Office (NCRPO) kag Makati City Police Office.
Bangud sini makighinun-anon sila sa Local Government Unit agud magpangayo sang suporta kag nagalaom ini nga ang ginrequest nga motorsiklo ang mapadasig agud nga matuman ang mando sang pamunuan sang PNP.
