Nagapati ang political analyst nga indi malayo nga matabo ang pahayag ni US President Donald Trump nga idismantle ang International Criminal Court (ICC).
Sa interview sang Bombo Radyo Bacolod kay Atty Jomax Ortiz, ini ang tuman ka dako nga isyu ilabi na nga ang Estados Unidos, nga ginakabig most powerful country kag international watch dog amo ang luyag nga magdula sang ICC.
Nagapati ang abogado nga nakita ni Trump nga kun ang Israel nga ila kaalyado ang maghimo sang pag-atake, madasig magpagwa sang warrant of arrest ang ICC.
Dugang pa ni Ortiz nga matalupangdan man nga gikan sa African Countries lamang ang nagaka-aresto, kag si former President Rodrigo Duterte lamang ang gikan sa Asya, samtang wala gid sang gikan sa European countries.
Indi man malayo nga maga-abot ang tion nga bisan si Trump ang dagdagan sang warrant of arrest sang ICC.
Apisar indi miyembro sang ICC ang US kag Israel, apang bangod ICC-member state ang Lebanon, ang ICC ang makapagwa gihapon sang arrest warrant.
Suno diri, indi malayo nga madissolve ang ICC bangod sa impluwensya sang America sa mga miyembro sang organisasyon.
Sa tion nga may matabo nga botohay, kag mayorya ang magpabor sa America, madula gid ang ICC, kag ang mabilin na lamang amo ang International Court of Justice.
Suno kay Ortiz ang International Court of Justice ang yara sa idalom sang United Nation, samtang ang ICC naman ang separado nga voluntary international organization.
Sa pihak nga bahin, nagapati ang abogado nga wala sang tyansa nga magabalik pa ang Pilipinas sa ICC, gani ang pungsod ang indi makaboto.
Samtang, kun madissolve ang ICC, mahimo nga mabuy-an naman si Duterte.
