Ginpanindugan ni House Majority Leader Dr. Janette Garin nga indi makasabat sa isyu sa West Philippine Sea ang pagpanaog ni President Ferdinand “Bongbong” Marcos Jr. sa pwesto.
Ini kasunod sang panawagan ni Davao del Norte 1st District Representative Pantaleon Alvarez nga dapat magbuya na sa pwesto si Presidente Marcos bangod sa nagalala pa nga aggression sang China sa West Philippine Sea.
Sa interview sang Bombo Radyo Bacolod kay House Majority Leader kag Iloilo 1st District Representative Dr. Janette Garin, malapit sini nga abyan kag iya nga ginatahod si former House Speaker Bebot Alvarez, apang pahanumdom sini nga may proseso sa pagpapanaog sang Presidente sa pwesto.
Pahanumdom sini nga gin-elect sang 31 million nga mga Pilipino bilang Presidente si Marcos gani ang tawo man ang may diber nga makapahalin diri.
Paathag niya nga magapanaog lamang ang Presidente kun matapos ang iya termino, ukon pinaagi sa impeachment.
Dugang pa ni Garin nga ang territorial dispute ang madugay na nga nagakatabo kag ini ang indi masolbar sa isa lamang ka gab-i.
Pahanumdom pa sini nga indi lamang Pilipinas kag China ang involve sa ginaagawan nga kadagatan kundi madamo sang iban pa nga pungsod.
Ginapasalamatan na lamang sini nga ginpakigbato ni late President Benigno “Noynoy” Aquino III sadto ang territorial claims sa kadagatan kag nagdaog sa Arbitral ruling sa International Court.
Panindugan sini nga indi husto nga ipanawagan sa Presidente nga magresign bangod indi masolbar ang isyu nga indi gid man mahapos solbaron.
Pahanumdom pa sini nga ginapanindugan man ni Presidente Marcos ang territorial claim kag wala man ginapanghatag ang West Philippine Sea.
Suno diri, indi man mahimo nga magsulod sa gyera batok sa China bangod wala ikasarang ang Pilipinas, gani ang pungsod ang dapat mangita sang diplomatic approach.
Dugang pa ni Garin nga dapat maseparar man ang territorial disputes kag mga economic activities agud ang Pilipinas ang makasurvive sa global trade.
Ginalantaw sini nga mahimo politika ang rasun sa pagpanawagan ni Alvarez sa pagpanaog ni Presidente Marcos, ukon ini ang may personal nga kaakig.
