Dakop ang isa ka panday sa ginpatigayon nga drug buybust operation sang Bacolod City Police Office – City Drug Enforcement Unit (BCPO-CDEU) sa Purok Roxas, Barangay Tangub, Bacolod City.
Suno kay Bacolod CDEU Head P/Lt Joven Mogato, ang subject ang ginkilala kay Robert Caniesares, 33 anyos residente sa lugar kag nagatrabaho bilang panday.
Pahayag ni Mogato nga nakabatun ang mga ini sang impormasyon nga si Caniesares ang nagabaligya sang iligal nga droga sa nasambit nga lugar gani ila ini nga gin validate kag ginsurveillance tubtob sa napatigayon ang operasyon.
Nakuha sa paghinakop sini ang walo ka sachet sang suspected shabu nga nagabug-at sang 17 gramos kag may ginabanta balor nga P115,600.
Suno kay Mogato, isa lang ang ginakuhaan ni Caniesares sang supply sang iligal nga droga kag ang duha nga nadakop sang CDEU sang nakaligad nga semana.
Ang mga ini ang natumod nga nagapanguna nga ginabagsakan sang supply ni Reymar Mosquida nga una naman nga nadakop sang Bacolod Police Station 2.
Paathag ni Mogato nga karun lang nila na-identify ang suspetsado kag wala pa ini sang record sa kapulisan, apang santo sa ila nga imbestigasyon madugay na ini nga nagaduso sang iligal nga droga.
Siya ang magapangatubang sang kaso may kaangtanan sa pagbayolar sang section 5 kag 11 sang Republic Act 9165 ukon Comprehensive Dangerous Drugs Act of 2002.
