Gin-surrender sang driver kag helper sang isa ka panel van ang balor P21.5 million nga gina-alegar smuggled cigarettes sa checkpoint sang Bacolod Police Station 4 sa Purok Hervabuena, Circumfirential Road sa Brgy Villamonte, Bacolod City alas-3:00 kaina sang kaagahon.
Sa inisyal nga impormasyon sang Bombo News Team, natalupangdan sang 27 anyos nga driver nga si Alyas Mario kag 20 anyos nga helper nga si Alyas Mark sang ginrentahan nga panel van, nga wala sang mga dokumento ukon resibo ang ginpakuha sa ila nga mga karton sang sigarilyo.
Ini ang gilayon man nila ginreport sa ila nga employer, nga nag-abiso nga isurrender sang mga ini ang illegal nga kargamento sa police station.
Natabuan naman nga samtang nagabyahe, nalabayan nila ang checkpoint sang Bacolod Police Station 4, gani didto na lamang sila nagdulog kag ginreport ang illegal nga karga.
Narecover sa panel van ang 200 boxes sang tabaco cigarettes kag 15 boxes sang cannon cigarettes nga may kabug-usan nga 10,750 reams.
Ang kada ream ang nagabalor P2,000, gani nagadangat ang market value sang illegal nga produkto sa P21,500,000.
Suno sa driver, sila ang ginkontrata sa pagdeliver sang mga karton sa Victorias City.
Apang wala pa sang mga ini mabuyagyag kun sin-o ang nagkontrata sa ila kag kun sin-o ang pagadul-ongan.
Ang mga alleged smuggled cigarettes ang iturn-over naman sa Bureau of Internal Revenue para sa formal verification kun ini ang naglapas layi sa excise tax kag smuggling.
Samtang, padayun nga gina-imbestigaran sang kapulisan ang source sang ginsurrender nga balor P21.5 million nga smuggled nga sigarilyo sa Bacolod Police Station 4.
Madumduman nga samtang nagapatuman sang checkpoint operation hinali nga ginreport sang driver sang panel van nga si Alyas Mario 27 anyos kag helper sini nga si Alyas Mark, 20 anyos nga nagaduda sila nga illegal ang ila karga.
Sa pagtsekyar sang kapulisan, natumod nga wala sang mga dokumento ang mga karton sang sigarilyo.
Sa interview sang Bombo Radyo Bacolod kay Bacolod City Police Office Spokesperson Police Captain Dax Santillan, ginadayaw nila ang pagka-alerto sang driver kag helper kag sa ihibalo kun legal ukon illegal ang ila nga kargamento.
Ginpasalamatan man sini ang pagsalig sang duha sa kapulisan.
Ginapakamaayo sini nga sila ang may risgo sa ila nga karga.
Nahibaluan nga nagdangat sa 10,750 reams nga sigarilyo ang narecover gikan sa mga karton nga karga sang panel van.
Ini ang mahimo makatuga sang kahalitan sa nagagamit ilabi na nga wala nakalabay sa mga nagakaigo nga evaluation kag kapierdihan man sa gobyerno bangod ang mga ini ang wala nagabayad sang tax.
Wala na ginbuyagyag ang ila pagadul-ongan sa Northern Negros Occidental kasubong man ang source, bangod sila ang magapatigayon pa sang mga follow-up investigations.
Panawagan ni Santillan sa iban nga may pagduda nga illegal ang ila ginadeliver ukon nabakal, nga ini ang isurrender sa kapulisan.
