Positibo para sa presidente sang United Sugar Producers Federation of the Philippines (UNIFED) ang dulot sang ginpagwa nga bag-o nga mando sang Sugar Regulatory Administration (SRA) nga naga-offer sa mga traders sang import opportunities kabaylo sang boluntaryo nga pagbakal sang tubtob 300,000 metric tons sang lokal nga raw sugar.
Sa interview sang Bombo Radyo Bacolod kay Manuel Lamata, sang nakaligad nga semana ang P3000 kada sako nga presyo sang kalamay ang nagpanaog sa P2400 sa kada sako nalang apang sang naglanog ang balita nga nagpagwa ang SRA sang mando nga mahimo makaimport ang mga traders kun kinahanglanon, sa kondisyon nga magbakal sang raw sugar sa mga local farmers, nagpanilumba ang mga ini sa pagbakal sang lokal nga kalamay.
Suno kay Lamata, bangud sa development ginalantaw nga magasaka pa sa P2900 ang presyo sa kada sako sang kalamay.
Santo sa order, ang mga traders kun kinahanglanon nga mag-import dapat magbakal ang mga ini sang local raw sugar nga 300,000 metric tons, may priority ang mga ini nga makaimport sang 200, 000 metric tons.
Suno kay Lamata, nagakarakasa ang mga traders bangud dako ang mahimo nila nga kwarta sa pag-import sang kalamay.
Ginpahayag man sini nga wala man sang problema para sa iya nga magpadamo sang kwarta ang mga traders, importante ang mill gate price.
Sa latest price monitoring sang Department of Agriculture, nakita nga ang presyo sang refined white sugar ang nagabalor P72 tubtob P100 kada kilo; ang washed sugar ang mabakal sa P68 tubtob P86 ang kada kilo samtang ang brown sugar ang nagabalor P59 tubtob P90 kada kilo.
