Ginhatagan sang Resolution of No Objection (RONO) sang Bacolod City Council ang isa ka water concessionaire nga luyag mag-operar sa ciudad.
Sa interview sang Bombo Radyo Bacolod kay Councilor Al Victor Espino, chairperson sang Committee on Laws and Ordinances sa Sangguniang Panlungsod, ang paghatag sang RONO ang wala nagakahulugan nga ginpahanugutan na ang Helpmade Incorporated, sa baylo ini ang inisyal nga tikang lamang agud sila ang makaproseso sang mga dokumento para sa pipe laying kag water distribution.
Paathag ni Espino nga madugay na sa industriya ang Helpmade, nga ginabanta 10 tubtob 15 ka tuig na nga nagaserbisyo sa isla sang Cebu kag Davao.
Suno sa konsehal, ginapahanugutan sang National Water Resources Board (NWRB) ang pag-operar sang masobra sa isa ka water provider.
Apang ang bag-o nga water concessionaire ang dapat magcater lamang sang mga lugar nga indi malab-ot sang existing nga water distributor ukon sa mga area nga mahina ang nagalab-ot nga water supply.
Paathag ni Espino nga siya mismo ang may personal experience bangod sa balay sini sa Brgy Villamonte, siya ang kinahanglan pa nga maghulat sang alas-2:00 sang kaagahon agud makasalod sa gripo, kag sa masami manual na lamang nga nagapanag-ob sa gwa.
Ini ang pamatuod nga madamo pa sang mga lugar nga indi malab-utan sang water supply gikan sa Baciwa – Prime Water.
Pinaagi sa paghatag sang RONO sa Helpmade sila ang makapatigayon na sang pagtuon kun paano makahatag sang serbisyo.
Wala paman ang mga ini sang namensyonar nga water sources kag volume sang tubig nga isupply sa ciudad.
