Kun ikaw ang makasugata sang zombie sa dalan, ano ayhan ang imo nga himuon?
Kun ang iban ang nagapalagyo kun makakita sang zombie, sa Mexico, gindagsa pa sang mga tawo ang mga nagaparada nga zombie.
Linibo ang nagpakigbahin kag nagtambong sa tuigan nga Zombie Walk sa Mexico.
Ang tuigan nga Zombie Walk ginahiwat antes magsaulog sang adlaw sang mga patay sa nasambitan nga pungsod.
Suno kay April, isa sa mga partisipante nga nagsuksok sang costume kag make-up bilang Zombie Queen, makahaladlok lantawon apang buhi kag maayo ang espiritu sang pamilya sa sini nga okasyon.
Ang ideya sang isa ka pinasahi nga parada nagsugod sa California apang ini ang ginahimo man sa nagkalainlain nga bahin sang kalibutan.
Suno kay April, ang ideya ang ginsunod lamang nila kag ginsugudan sang 2007.
Pahayag naman ni Chumoy Zombie Master, ang organizer sang kahiwatan, nga ginapasanyog nila ang imahe sang Mexico paagi sa pag-angkon sang isa sa pinakadaku kag pinakamatahom nga Zombie Walks sa kalibutan.
