Ginatinguhaan sang Paradox Bacolod (PRDX BCD) Hip-Hop Group mabag-o ang paglantaw sang publiko kag mas mapakilala pa ang Hip-Hop music sa syudad sang Bacolod kag probinsya sang Negros Occidental.
Sa interview sang Bombo Radyo Bacolod sa isa sa miyembro sang grupo nga si John Ray Dilag ukon Jray, ang Paradox Bacolod ang ginabug-usan nila nanday Christian Arellano ukon Aether kag Steven Cantiller ukon Slick.
Paathag sini nga ang Hip-Hop ang natunga sa apat ka elemento nga ginalakipan sang Rapping, Graffiti Artists, Break Dancing kag sila nga mga nagacompose sang mga rap songs.
Suno diri, nag-umpisa ini sa Hip-Hip sang 2007, sa tion nga indi pa kilala ang Hip-Hop sa Bacolod samtang sila ang miyembro naman sang lainlain nga grupo.
Sang 2019, nadesisyunan nila nga humanon ang Paradox Bacolod kun sa diin ang nagapanguna nila nga adbokasiya amo ang mashowcase ang Hip-Hop talent sa Bacolod.
Ini bangod nakita nila madamo sang may-ara sang potensyal sa syudad apang wala lang nagakahatagan sang tyansa nga ipakita ang talento.
Paathag ni Jray nga ang Paradox ang nagakahulugan nga kontra sa isa ka pagpati, kun sa diin target nila nga mabag-o na ang anay malain nga panulok sa Hip-Hop.
Aminado ini nga sadto, sa tion nga mabatian ang Hip-Hop may iban nga nagapaminsar nga ini ang nahanungod na sa gangs ukon violence, apang sa padayun nga dalagan sang panahon, paathag sini nga nagabag-o man kag naga-evolve ang genre.
Kaangay sa ila nga masami ang mga composition ang nagapromote sang positivity.
Amat-amat naman sang mga ini nga nabag-o ang pagtratar sa mga artist sa syudad kun sa diin sadto, exposure lang gid ang ginahatag para sa ila kag halos nga wala na sang madala apisar nga malayo pa ang ginapulian.
Apang sa karun, pinaagi sa ila adbokasiya, makita na ang matuod-tuod nga suporta sa mga artists kag bisan paano ang mga nagaperform sa mga programa ang may-ara na sang bisan gamay lamang nga mapauli sa ila pamilya.
Ang Paradox Bacolod ang may-ara man sang gintukod nga music studio nga mahimo magamit sang mga aspiring artist sa barato lamang nga presyo.
Ini ang nakita nila nga pamaagi agud nga makabulig sa kaangay nga mga Hip-Hop artist sa syudad sang Bacolod kag probinsya sang Negros Occidental bangod sa masami ang kakulang sang kaangay nga pasilidad ang nagabalabag agud nga magtinguha ang mga may talento sa paglab-ot sang ila handom.
Ang Paradox Bacolod ang nakalunsyar na sang duha ka mga music video sa youtube kag spotify samtang si Jray ang nakarelease man sang iya nga solo track tinalikdan nga semana.
