Gin-athag sang presidente sang Parents Teachers Association sang Domingo Lacson National High School nga wala sila nakahibalo nga sa SMX Convention Center ang moving up ceremony sang completers kahapon.
Ang mga ginikanan ang nagbayad sang P350 para sa kada estudyante.
Sa interview sang Bombo Radyo kay Rachel Moncatar, wala napahibalo ang PTA nga SMX ang venue bangud wala man sila ginpatawag.
Ginsapol ni Moncatar ang PTA board kag nag-upod man diri ang duha ka adviser sang Grade 10 gani sila ang ginpamangkot sang rason sang paghiwat sini sa gwa sang DLNHS.
Suno sa manunudlo, direkta nila nga ginsurvey ang mga ginikanan kag nagpasugot man ang mga ini nga mabayad sang P350.
Manunudlo naman ang magabayad sang alamutan sang estudyante nga indi makabayad.
Naghingyo naman si Moncatar nga pasakaon gihapon ang mga estudyante nga makasarang magbayad sang P350 kag indi man pag-ihold ang card.
Suno sa principal, ginatuman nila ang NO COLLECTION POLICY gani nakibot ini sa pagpaamot sang P350.
Suno sa mga school officials, indi mag-igo ang mga estudyante kag ginikanan sa gym sang DLNHS bangud 900 ang nagpadayon sa masunod nga year level kag subong man mainit.
Wala naman sang ideya ang PTA angot sa report nga sa Ayala Mall ang graduation ceremony subong nga adlaw.
Suno sa Division Office, wala ginadumilian ang pagpatigayon sang programa sa gwa sang eskwelahan basta ginkasugtan ini sang mga ginikanan.
