Apisar masobra pila ka oras ang byahe halin sa iya nga parokya, wala ini nakaupang sa isa ka pari sa Negros Occidental nga magdonar sang dugo sa Dugong Bombo sa Bacolod.
Masobra duha ka oras ang ginbyahe ni Fr. Rembert Rivera halin sa Kabankalan City gani kaagahon pa lang naghalin na ini sa simbahan agud magbyahe pa-Bacolod kag pasado alas-6 pa lang sang aga, yara na sa venue si Fr. Rivera.
Ini na ang pang-apat nga beses nga nag-ugyon ang pari sa Dugong Bombo.
Si Rivera ang isa ka avid listener sang Bombo Radyo Bacolod kag nagadonar man ini sang pamahaw kada may aktibidad ang istasyon.
Kahapon, bitbit pa sang pari ang duha ka tray sang linaga nga itlog kag ginpamahaw pa sang pila ka successful blood donors.
Samtang, timprano pa man nga nag-abot sa venue ang alkalde sang Valladolid nga si Mayor Enrique Miravalles agud magdonar sang dugo.
Ini naman ang pang-apat ka beses sang alkalde nga magdonate sang dugo sa Dugong Bombo.
Suno sa iya, panaad niya na ang pagpakuha sang dugo kada Nobyembre.
Kaupod man sa mga nagdonate sang dugo ang pila ka mga hepe sang pulis sa Negros Occidental.
Suno kay Police Capt. Wilfredo Benoman, hepe sang EB Magalona Municipal Police Station, gilayon sila nga nagresponde sang iya mga tinawo sa panawagan nahanungod sa blood donation agud makabulig sa mga nagakinahanglan.
