Ginpanawagan sang pari ang pagdumdom sang matuod nga essence sang All Saint’s Day kag All Souls Day.
Sa interview sang Bombo Radyo Bacolod kay Rev. Fr. Agot Hinayan, resident priest sang St John Marie Vianney Shrine Domus Dei sa Silay City, kultura na sang mga Pilipino ang pagpadulong sa mga sementeryo kag pagluto sang mga kakanin sa Nobyembre 1.
Apang paathag sini nga sa Catholic Christian Doctrine, ang Nobyembre 1 ang All Saint’s Day samtang All Souls Day naman ang Nobyembre 2.
Suno diri, may-ara sang tatlo ka katilingban, nga ginalakipan sang Church militant, Church triumphant kag Church suffering.
Ang Church militant amo ang sa karun nga mga tumuluo, samtang ang Church Triumphant amo ang mga napatay nga mabuot, nga ginalakipan sang mga ginahimo Santos kaangay nanday San Pedro Calungsod kag San Lorenzo Ruiz, samtang may-ara man sang iban nga undeclared.
Samtang Ang Church suffering amo naman ang napatay nga nakasala kag ginpatawad na matapos maghinulsol.
Apang sila ang ginahamtang anay sa purgatoryo para sa debt punishment bangod sila ang may kasal-anan nga kinahanglan pa nga bayaran.
Paathag ni Fr Hinayan nga wala sang problema sa pagpadulong sa sementeryo, pagsindi sang kandila, paghalag sang bulak kag pagluto sang mga kakanin, bangod ini ang expression sang pagtuo, apang indi dapat kalimtan ang pagpangamuyo sa kalag sa langit kag sa purgatoryo.
Apang ginadiscourage sang simbahan ang pag-intra sang makahaladlok nga imahen kaangay sa Halloween, sa pagsaulog sang piyesta minatay.
Ginapakamaayo man sini nga may programa ang mga deboto nga ginapabisti ang mga kabataan kaangay sang Santos kag ginaportray ang kabuhi sang mga ini.
Panawagan man sini nga dal-on ang mga kabataan sa simbahan sa piyesta minatay, samtang ang kada parokya ang magapatigayon man sang misa sa tagsa ka sementeryo.
