Nagalaom ang pinuno sang Parish Pastoral Council for Responsible Voting (PPCRV) sa Negros Occidental nga madugangan pa ang ila mga volunteers nga magaserbe sa eleksyon sa Mayo 9.
Sa interview sang Bombo Radyo kay Father Chris Gonzales, padayon pa ang paglista sang mga volunteers ilabi na nga nagahatag man ang kada parokya.
Sa karon suno kay Gonzales, indi magnubo 1,500 na ang nalista nga volunteers para sa Negros Occidental.
Sa Sabado, patigayunon na ang general assembly sang mga volunteers kun sa diin igapaidalom sila sa orientation.
Bangud ginalikawan ang pagtililipon sang madamo nga mga tawo, magapadala lang sang tiglawas ang kada parokya samtang ang iban naman ang magatambong lang sa online.
Diri naman igaorient ang mga volunteers kun ano ang ila obligasyon sa eleksyon.
Suno kay Gonzales, indi kinahanglan nga yara sa voting centers ang tanan nga volunteers sa adlaw sang eleksyon bangud may pipila nga indi pa botante, ang importante nga sila ang makabulig sa transparent nga piniliay.
Madamo naman nga volunteers ang makapila na ka beses nagvolunteer samtang ang iban ang first timer.
