Nadulaan sang maayo nga pari ang diocese of Bacolod sa pagtaliwan ni Msgr Felix Pasquin sa edad nga 78 anyos alas-9:02 kahapon sang aga.
Sa interview sang Bombo Radyo Bacolod kay Fr. Rayman Asoy, parish priest sa Jose Abad Parish Church, ang magretiro si Msgr Pasquin makaligad sang 51 ka tuig nga pagerbisyo bilang pari, ginpili sini nga magtinir sa nasambit nga parokya kun sa diin siya ang nagabulig man sa mga misa kag iban pa nga mga aktibidad sa simbahan.
Ini bangod sila ang malawig man nga nagkaupod sang siya ang deacon tubtob nangin pari sa Silay.
Suno kay Fr. Asoy, sa 20 ka tuig niya nga pagkapari, madamo ang natun-an sini gikan kay Msgr Pasquin, bangod sa kabuot sini, commitment sa simbahan.
Pahayag sini nga indi mo mabatyagan nga may ginabatyag si Msgr Pasquin bangod ini ang mapagsik kun sa diin siya ang ulihi pa nga nagmisa sang Disyembre 25.
Nag-umpisa nga maglain ang pamatyag sini sang Disyembre 28 tubtob nga na-ospital sang Disyembre 31.
Nagapinsar pa si Fr. Asoy nga makagwa lang gilayon si Msgr. Pasquin bangod maayo man ang sitwasyon sini sa ospital kun sa diin siya ang ulihi nga nakabisita diri sang Enero 4.
Suno diri, nagpahayag pa si Msgr Pasquin nga luyag sini magbalik sa Jose Abad Parish Church bangod luyag sini nga buligan si Fr. Asoy sa misa.
Gani ginkakibot sini ang hinali na lamang nga pagkadula sang pari.
Pahayag ni Fr. Asoy nga tuman ka hapos pakigbagayan si Msgr Pasquin, kag makita gid ang pagpalangga sini sa mga tawo.
Nakasugilanon na ni Fr. Asoy ang pamilya ni Msgr Pasquin kag nakasugtan nga ini ang ihaya sa seminaryo sa Sacred Heart Shrine ukon Lupit Church sa Barangay 39, Bacolod City.
Sa Miyerkules, natalana man nga magmisa ang mga obispo sa Visayas bangod si Msgr Pasquin, ang malapit man sa mga ini.
Sa inisyal nga paghinun-anon, ang lubong ang patigayunon sa Enero 16 alas-2:00 sang hapon apang wala pa nadisesyunan kun sa diin ini igalubong.
Suno kay Fr. Asoy, madamo na sang mga nagbisita sa ila agud ipamangkot ang haya ni Msgr Pasquin, gani dako ang pagpasalamat sini sa tanan nga mga parokyano nga nagapalangga kag nagsuporta kay Msgr Felix Pasquin.
