Nagapati ang kora paroko ukon parish priest sang San Antonio Abad Parish Church nga may yara sang natalana nga misyon ang Ginoo sa lapsag nga ginbilin sa San Sebastian Cathedral kahapon.
Ang lapsag nga lalaki ang nasulod sa yellow nga eco-bag kag natungtong sa sofa sa lobby sang opisina sa San Sebastian Cathedral.
Ini ang naputos sa lampien, may diaper kag sa sulod sang bag, may bayo kag jacket sang iloy apang wala naman sang sulat nga ginbilin.
Sa interview sang Bombo Radyo kay Monsignor Felix Pasquin, kaluoy ang iya nabatyagan para sa lapsag.
Suno diri, ang bata ang isa ka kalag nga dapat luwason kag maayo man para sa iya nga ginbilin sa simbahan ang bata kag indi na kun sa diin-diin pa.
Dako man ang iya pasalamat sa Ginoo nga buhi ang bata.
Suno kay Pasquin, kada isa may yara sang misyon sa kalibutan kag siya nagapati nga may natalana nga misyon ang Ginoo para sa bata.
Iya man ginalauman nga makabatyag sang kaluoy ang iloy sang bata kag magbalik agud makuha sini ang iya bata.
Ginkaangay sini ang pagkasapwan sang bata sa nahitabo man sa ciudad sang Silay, kun sa diin may yara man sang bata nga ginbilin sa simbahan kag ini ila ginpadako kag gin-adopt sang Gaston family, kasubong man nga ginkaangay niya ang lapsag sa karun nga senadora sang Piliipinas nga si Senator Grace Poe nga sang lapsag pa ginbilin sa simbahan sang Jaro sa Iloilo.
Suno kay Pasquin ang tanan may yara sang kabuhi naggikan sa Diyos kag ini ikabuhi para sa misyon kag himaya sa Diyos.
Samtang, wala naman sang CCTV sa sulod sang lobby gani indi matumod kun sin-o ang nagbiling sa lapsag.
