Gin-athag sang Park Superintendent sa Mt Kanlaon Natural Park nga ang 2022 Mt. Kanlaon Natural Park Festival ang tuigan nga ginapatigayon agud mapromote ang eco-tourism kag makahatag sang awareness sa pagprotekta diri.
Suno kay Dennis Pinosa, ang Mt Kanlaon Natural Park ang isa ka protected area nga ginakinahanglan nga atipanon.
Ini ang ginhuman sang Agosto 11, 2001, kag ginlegislate sa tinutuyo nga maprotektahan ang biodiversity sa kabukiran.
Dugang pa ni Pinosa nga tinutuyo man sang mga ini nga madevelop ang lugar agud nga mangin produktibo kag mapasanyog ang eco-tourism.
Ang MKNP ang ginabug-usan sang 14,388 hectares sang duta kag natunga nsa masobra 1,000 hectares nga strict protection zone kag masobra 13,000 hectares nga multiple use zone.
Paathag sini nga sa strict protection zone wala sang ginapahanugutan nga makasulod agud magpatigayon sang aktibidad kaangay sang pag-utod sang kahoy kag iban pa nga detrimental activities.
Samtang may 15 naman ka mga barangay gikan sa nagkalainlain nga local government units (LGUs) ang nahamtang sa sulod sang multiple use zone.
Apang suno kay Pinosa, samtang nagasaka ang populasyon sa probinsya, mas ginakinahanglan man ang pagpasanyog sang proteksyon sang biodiversity sa sulod sang MKNP.
Ginakalipay naman sang Department of Environment and Natural Resources (DENR) ang kooperasyon sang mga LGU partikular na sa tourism kag environment offices.
Paathag ni Pinosa nga ang kooperasyon sang mga LGUs kag nagkalainlain nga sektor ang nagahatag sang kapagsik para sa ila agud magpadayun sa adbokasiya.
Suno diri magluwas sa LGU, nagapakigbahin man sa adbokasiya ang mga Indigenous People Community kag mga Barangay.
Paathag sini nga sa tion sang pandemic ang ila nga tema amo ang “mapag-on nga kumunidad sa tunga sang kalamidad”, gani ginalauman na sini nga masentro naman sa recovery ang masunod nga mangin tema sa ila mga programa.
Suno kay Pinosa nagasanyog naman sa karun ang turismo sa probinsya apang bangod nagapabilin pa ang Alert Level 1 sa Mt Kanlaon, ginadumilian gihapon ang pagsulod sa 4 km danger zone.// Samtang dugang pa sini nga ang Environment Protection Activities ang indi mahapos nga trabaho.
Apang bangod sa pagbuligay sang LGU kag kumunidad malipayon nila nga nagakapatigayon ang trabaho.
Pangabay ni Pinosa nga mapasangkad pa ang pag-engganyo sa kooperasyon sang iban sa tinutuyo nga mahatagan sang proteksyon ang Mt Kanlaon Natural Park.
